上海闲话｜听钱程朗读：忘记《繁花》看《繁花》

　　王家卫执导个电视连续剧《繁花》，十年磨一剑，终于闪亮登场，各种评说像潮水一样冲过来，关注度第一无法否定。

　　到目前为止，勿满意个声音大致有两点：一是和原著比，认为人物、情节等等差别太大；二是勿适应王氏表达方式，走勿进“黄河路”。首先，王家卫拍戏，从来勿谈忠于原著，电视剧《繁花》只不过取了原著里几个人物个名字，以及伊拉之间个大致关系，挑出某个历史时段，放大、渲染、深化。所以，谈论王家卫个《繁花》呒没必要拿金宇澄个原著扯进来。而电视剧《繁花》眼花缭乱个剪辑，快节奏个切入，貌似随意个倒叙，再加上一点“忠于原著”个旁白，对已经养成看剧习惯的个人来讲，陌生感强烈是正常嗰。

　　一般常规个电视剧，应该类似于章回体小说，每一集有一个小高潮，用来吸引观众。当然，大多数电视剧呒没做到。王家卫个电视剧处女作呒没遵循搿种规律，仍旧采用拍电影个思路，只不过受每一集长度个限制，勿得勿分出一两三四……当然，搿能处理突出了王家卫个特点，同时包括了优点和缺点，只有拿电视剧《繁花》当作一部超长个电影，来看宝总和三个女人个故事，才会原谅某几集个相对平缓和冗繁，而惊诧于某几集个精彩和刺激。

　　总体来讲，王家卫个《繁花》个影调是好得呒没闲话讲嗰，商战戏拍出了谍战戏、反毒戏个感觉也老惊艳。重要个是，伊拿近几年来上海话被综艺化、滑稽化、庸俗化个倾向扳回到正常个沪语语境。跟广东闲话以及任何方言一样，上海话也勿应该被用来作为低级消费个元素，无论《繁花》个原著还是电视剧，侪做到了。

　　现在还只是看了几集《繁花》，接下来个感觉哪能勿好讲，只有“勿响”。（作者：老老夏；朗读：钱程）