上海闲话｜听钱程朗读：汪小姐与排骨年糕

电视剧《繁花》里向，汪小姐欢喜吃排骨年糕，开心辰光吃，勿开心也吃。为啥？排骨年糕价钿实惠呀！开心辰光，跟宝总一道去吃，伊吃排骨，宝总吃年糕。勿管啥人买单，侪属于君子之交，至淡至简就像一客排骨年糕。勿开心也吃，一家头勒店里坐好仔，气哼哼，连夯三客，再气吞山河喊一声：老板，再来一客！

汪小姐穷，伊自家讲嗰，“晓得我做啥介穷？”一声声一句句，全部是做小姑娘个清高搭仔家教。勿好拿人家个贵重物事，拨阿爸晓得要骂嗰。搿就是家教，娇滴滴个上海小姑娘，从小阿爸姆妈呒没少敲木鱼，吃人家嘴软，拿人家手短。覅讲还呒没敲定，就是结仔婚，还要自家用自家赚，才能够活得挺挺括括。

按宝总个为人做派，逢年过节总归要送点啥好物事，但是好物事个价钿侪勿便宜，哪能好随随便便收啦？只好自家出钞票买下来，所以，汪小姐就只好一直穷下去了。《繁花》看到现在，顶顶欢喜汪小姐，活得像风一样爽爽气气。

其实，人活勒迭个世界浪，算计来算计去侪是正常嗰，迓迓交暗黜黜，讲起来叫稳笃笃。所以宝总讲：“做生意要学会两个字，勿响。勿该讲嗰，讲勿清爽嗰，呒没想好嗰，呒没把握嗰，为难自家为难人家个事体，侪勿响。”汪小姐偏生刮辣松脆：我就要一是一，二是二。看到两家头钻出差头，立勒马路边浪吵相骂，心里有一点点痛，两个可以合吃一盆排骨年糕个男女，心里想嗰讲嗰是两桩事体，一个是做生意，一个谈敲定。一个是勿见兔子勿撒鹰个男人，一个是连屋里向抽水马桶坏脱也可以讲出来个女人。

因为一副珍珠耳环，汪小姐只过了一夜就从白雪公主变成了“辛蒂瑞拉”（灰姑娘），前一天还是一头妩媚妖娆个大波浪，就拨扎成了一根乱蓬蓬个大辫子。看上去光鲜实则蹩脚个一副珍珠耳环，精于算计个男男女女老老少少一大串，拳打脚踢，图穷匕见……只有汪小姐，因为欢喜迭个送耳环个人，戴好仔出风头，扎台型，花两万六千块买下来，结果，还是被算计得一败涂地。

第四客排骨年糕汪小姐到底是退了还是吃了勿重要。汪小姐换好工作服，扎好头发，开始收作仓库里个垃圾。头颈犟犟腰挺直个汪小姐让人欢喜，也让人肉麻（心疼）。

接下来么，做一客上海排骨年糕吃吃。

排骨两块，拍拍松，加盐、胡椒粉、蛋清、生粉，腌廿分钟。一小醏豆瓣酱，摆油镬里，倒高汤进去，烧开，摆糖，烧成酱汁备用。

排骨摆勒鸡蛋面糊里拖一拖，进油镬，炸成金黄颜色，就可以摆到盘子里了。三四根新鲜软糯个“鞋底板”宁波年糕，油里稍微炸一炸，捞出来，摆勒排骨旁边，淋一点酱汁就好。

好了，一份只分享同一种味道搭仔氛围个排骨年糕就迭能横空出世了。（作者：沈一珠；朗读：钱程）